iPhone 16 Pro 40 vatt sürətli şarj alacaq
2024-cü ilin payızına planlaşdırılan “Apple” smartfonları ilk dəfə olaraq sürətli enerji doldurma sistemi alacaq.
Mənbələrin məlumatına görə, 40 vatt gücündə sürətli naqilli enerji doldurma iPhone 16 Pro və iPhone 16 Pro Max flaqman smartfonlarında peyda olacaq. Cihaz 20 vatt simsiz enerji doldurmanı da dəstəkləyəcək. Çox güman ki, iPhone 16 və 16 Plus-da şarj sürətləri eyni qalacaq.
Hazırkı ən yüksək səviyyəli iPhone 15 Pro və iPhone 15 Pro Max modelləri maksimum 27 vatt güclə doldurula bilər, lakin yalnız USB-C portu olan xüsusi adapterdən istifadə edildikdə. Maksimum MagSafe simsiz şarj sürəti 15 vattdır.
İnsayderlərin fikrincə, güclü doldurmaya dəstək batareya tutumunun artması nəticəsində yaranan doldurulma müddətinin artması problemini həll edəcək. iPhone 16 seriyası modellərinin daha böyük batareya alacağı gözlənilir.
Materialda deyilir ki, cihazların tezliklə buraxılması ilə əlaqədar yeni Apple smartfonları haqqında xəbərlər daha tez-tez görünməyə başlayıb. iPhone 16 seriyalı cihazların elanı sentyabrın ortalarında gözlənilir.
Bundan əvvəl 9to5Mac-ın jurnalistləri xəbər vermişdilər ki, Apple payızda bir neçə qadcet buraxmağı planlaşdırır. iPhone 16 telefon xəttinə əlavə olaraq şirkət yeni qulaqlıqlar, ağıllı saatlar, planşetlər və kompüterlər təqdim etməlidir.